Bu siqaretlər sizi zəhərləyə bilər — Ekspert XƏBƏRDARLIQ ETDİ

“Siqaret də bölgüdə qida məhsulu sayılır və dünyada, eləcə də Azərbaycanda yeyinti məhsulları haqqında Qanunda da göstərilir ki, üzərində yararlılıq müddəti göstərilməyən məhsulun satışı qadağandır. Bu zaman həmin qida məhsulunun qəbulu təhlükəlidir və insanı zəhərləyə bilər”.
“Ölkə.Az” xəbər verir ki, bu fikirləri Yenicag.az-a açıqlamasında Azad İstehlakçılar Birliyinin sədri Eyyub Hüseynov satışda olan, üzərində son yararlılıq müddəti qeyd olunmayan spirtli içki və siqaretlərin insan sağlamlığına təhlükəsini şərh edərkən deyib.
Ekspert illərdir ki siqaret və spirtli içkilərin etiketləri üzərində buraxılış və son yararlılıq tarixinin göstərilməsi üçün iş apardıqlarını bildirib:
“Azərbaycanda illər əvvəl tütün və tütün məhsulları haqqında Qanun qəbul ediləndə parlamentdə radikal çıxışımla təklif etdim ki, bu məhsulların üzərində hər iki tarix göstərilsin. Yalnız buraxılma tarixinin qeyd olunmasına nail olduq. Son yararlılıq müddətinin qoyulmasına nail ola bilmədik. Bu da insan sağlamlığı üçün böyük təhlükə yaradır.

Dünyanın bir çox inkişaf etmiş iri dövlətlərində də belədir. Lakin tütün dünyada böyük dövriyyəsi olan məmulat olduğundan, tütünlə məşğul olan insanların lobbiçiliyi standartların tətbiqinə imkan vermir. Analoji məsələ spirtli içkilərə də aiddir. Əhali bilməlidir ki, satış şəbəkəsində arağın saxlanma müddəti bir, konyakın üç, şərabın isə altı aydır. Bəzən belə hesab edirlər ki, şərab nə qədər çox qalsa, keyfiyyətli olar, yanlış fikirdir.
Bu xüsusi şəraitdə saxlanılan keyfiyyətli içkilərə aiddir”.

E.Hüseynov vaxtı keçmiş spirtli içkilərin satış şəbəkələrindən geri qaytarılandan sonra aksiz vergisinin geri götürülməsini təklif edir:

“Vaxtı keçmiş spirtli içkilər satış şəbəkələrindən geri qaytarılandan sonra aksiz vergisi geri götürülsün və həmin məhsulların uçotu aparılsın. Biz bunun həm tütün məmulatları, həm də spirtli içkilərə tətbiqinə nail olacağımıza əminik”.

Pin It

Şərh üçün bağlıdır.